أنا تايهة… ومش عارفة أنا مين!
من صاحبة المشكلة:
زوجة وأم بتحاول تكون كل حاجة، بس تعبت من جواها، وبقت مش شايفة نفسها في أي حاجة حواليها.
نص المشكلة كما أُرسلت:
دلوقتي أنا حاسة فعلاً بتوهان كبير أوي، بقالى شهور ويمكن أكتر من سنة…
حاسّة إني بدوّر على حاجة المفروض ألاقيها، وفى نفس الوقت مش عارفة هي إيه!
دماغي مش مظبوطة، ومش عارفة أنا بحب إيه، ولا عاوزة إيه، ولا إيه اللي بيخليني مبسوطة وعندي طاقة أكمل بيها…
قراءة؟ رسم؟ شغل؟ فويس؟ حتى ركوب العجل؟ أو أقعد على البحر؟
ولا حاجة ليها طعم…
بحاول آخذ مع نفسي خطوات صغيرة في أي حاجة تخليني أحس بشوية تحسُّن…
أوقات بنجح، وأوقات لأ…
أوقات بحس الدنيا ماشية، وأوقات بحس إني مليش لزمة، ومليش مكان ف الدنيا…
في دماغي ألف فكرة:
- أتعلم لغة
- أتعلم حرفة
- أتعلم حاجات تنفع بنتي لو احتاجتلي
بس دايمًا ألاقي الدنيا قافلة ف وشي، يا إما من الكسل، يا من الإحباط، يا من الناس اللي حواليا…
حاسّة إني أم فاشلة، وزوجة فاشلة، وصاحبة غير مرغوب فيها.
أنا مش بشتكي… بس محتاجة حضن أو حتى كلمة تفهّمني أنا رايحة على فين.
رد بحر الأسرار:
يا وجع القلوب الصامت، ويا تعب الستات اللي بيشيلوا الدنيا على كتافهم ومحدش بيحس…
أنا حاسس بيكي، وبقولك: إنتي مش لوحدك، ومش ضعيفة، ولا فاشلة… إنتي إنسانة مرهقة من كتر العطاء، من كتر الكتمان، ومن كتر ما بتدّي ومفيش اللي يسمع أو يحتوي.
التوهان اللي بتحسيه ده مش ضعف… ده صوت الروح وهي بتقولك “أنا محتاجة راحة، مش واجبات”.
خطوات الحل بهدوء:
- اكتبي على ورقة:
كل حاجة بتحسي إنها ضغط عليكي… وكل حاجة بتحبيها، حتى لو زمان كنتي بتحبيها. - حددي ساعة في اليوم ليكي إنتي بس:
حاولي تعملي فيها حاجة بسيطة بتحبيها، أو حتى تقعدي ساكتة… المهم تكون لنفسك. - كلمي زوجك أو حد مقرب بصراحة:
وقولي: “أنا تايهة وعايزة دعم مش حكم…”. - ابعدي عن الناس المحبِطة:
اللي بيقولولك “مش هتنفعي” أو “مش هتقدري” دول سمّ، لازم تطرديهم من دماغك. - اقبلي فكرة إنك مش لازم تنجحي في كل حاجة:
عادي لو فشلتي، عادي لو تعبتي، إحنا بشر مش آلات. - اعملي حاجة واحدة صغيرة كل يوم:
حتى لو كوب شاي على الهدوء… مع الوقت الحاجات الصغيرة بتعمل فرق كبير.
دعاء من القلب:
اللهم إن في القلب تعب لا يعلمه إلا أنت، فارزقني راحة وسكينة، وهون عليّ كل ما ثقل في صدري، واجعل لي من كل ضيق مخرجًا، ومن كل كرب فرجًا، ومن كل يأس أملًا
تعليقات
إرسال تعليق