ما بين قلب أم وولادها… وزوج بيقول “أنا ماليش دعوة بيهم”

 ام بعتت تقولي 

انا عندي مشكله تعبت منها جدا اقسم بالله نفسيا وصحيا

أنا عندي ولدين 17و18 سنه هما يتامي وانا بحكم الناس والزمن والظروف تزوجت من عمهم

هو اصغر مني سنا لكن متفاهمين الحمد لله

بس مشكلته مع اولادي

هو مش بخيل عليهم ولا حرمنا من حاجه

معاه بيجيب مش معاه الله غالب وحضرتك عارف الظروف

احنا قاعدين في شقه ايجار قديم

اولادي بيشتغلوه ارزقيه بس مش بيدوني فلوس وبيصرفه كل فلوسهم علي نفسهم

وبيطلعه عندي يأكله ويشربه

المشكله هنا من زوجي دائما خناق وزعيق ومشاكل بسبب الموضوع ده

لا هو طايقهم ولا هما طايقينه

لدرجة أن اولادي اوقات ينزله مايرجعوش يباتوه في الشارع

طبعا بحكم الام مش بنام ولا بهدي

بفضل انزل ادور عليهم للفجر ومش بعرف اغمض عين غير لما اشوفهم بخير

وهو برضو يفضل بعملي مشاكل

هو بيجيب لهم كل حاجه زي ابنه لاني مخلفه منه ولد وبنت

بس بيرجع يقولي أنا جبت علشان خاطرك انتي

ومش بيسكت

أنا حرفيا تعبت

كل يوم نفس الموضوع

كل يوم نفس المشاكل نفس الحوار

أنا والله مدمره

لدرجة اني مش قادره حتي اقف علي رجلي من التعب والارهاق اللي بعيشه

ولا حتي بنام للصبح

دائما صاحيه

اعمل ايه

انا تعبانه جدا نفسيا” 

رد بحر الأسرار:

يا بنت الأصول…

محدش يقدر يلومك لا على زواجك ولا على تعبك، لكن المشكلة دي مش مشكلة ولاد ولا راجل… المشكلة إنك بتحاربي لوحدِك، وبتتحرقي بين نارين: عيال محتاجين حنان واحتواء، وجوز بيحاول يرضي ضميره وضميرك بس مش قادر يبلع اللي بيحصل.

ولادك يتّامى آه، بس كبروا، ولازم يحسوا إنهم رجالة، مش عبء عليكِ. لازم تقعدي معاهم، بهدوء مش بدموع، وتفاهميهم إن الرجولة مش بس شغل وفلوس… الرجولة احترام البيت والست اللي شالتهم وهي مكسورة.

وجوزك؟

لو بيحبك فعلاً، لازم يفهم إن جوازك منه كان مش بس شراكة بين اتنين، ده كان عهد بينه وبين أولاد أخوه. لو مش قادر يحتويهم، يبقى لازم يحتويك… لأنك انتِ الخط اللي بيجمعهم كلهم.

حاولي تهدي… رتبي البيت من أول وجديد، بالحب مش بالقسوة.

خلي كل واحد يعرف مكانه وقيمته…

وما تنسيش… الأم اللي قلبها صاحي طول الليل، ربنا عمره ما بيكسفها