مرض وراثي نادر بيهدد أمي وأنا… ومش عارفة أتكلم
تعريف بالمُرسلة:
رسالة من فتاة في بداية العشرينات، بتواجه أزمة صحية صعبة، ومش عارفة تبدأ منين ولا تتكلم مع مين!
نص المشكلة:
“بصراحة يا بحر الأسرار، أنا من فترة كنت ناوية أكشف جلدية، والحمد لله عملت كده، والدكتورة قالتلي إن عندي حاجة اسمها “ترسب بروتين في خلايا الجلد”. قالتلي إن المرض ده نادر وغالبًا بيكون وراثي.
المصيبة مش فيا، المصيبة إن ماما باين عليها نفس الأعراض، بس احنا عمرنا ما عرفنا، ولا هي تعرف!
دلوقتي ماما بتشتكي من تنميل في إيديها، ولما دورت لقيت إن ده من أعراض المرض، ولقيت كمان إن نهايته ممكن توصل لشلل في الأطراف!
أنا مرعوبة، مش عارفة أبدأ منين… أخاف أقول لماما فتتعب أكتر من القلق، وأخاف ما أقولش وأكون بأذيها وأنا ساكتة!
مش عارفة أفتح الموضوع مع إخواتي ولا مرات أخويا، ومش لاقية حد أفضفض له، ومخي مش قادر يهدى!
أنا أصلاً عندي كل الأعراض دي من زمان، لكن خلاص اتعودت… بس خوفي على ماما بيكسرني.
أنصحني أعمل إيه؟”
رد بحر الأسرار:
يا بنتي، أول حاجة محتاج أقولها ليكي، إن خوفك على أمك دليل إنك بنت بميت راجل. بس خليني أقولك: السكوت في الحالة دي مش أمان، السكوت ممكن يبقى خطر.
خطوات الحل:
- ابدئي بهدوء:
ما تقوليش لماما كل حاجة مرة واحدة، ممكن تبدأي بسؤال بسيط: “حاسّة بالتنميل؟ بتحسي بتعب في إيدك؟” خدي منها معلومات بهدوء من غير ما تروّعيها. - استشيري طبيب موثوق:
قبل ما تروّحي لماما بالكلام ده، خدي رأي دكتور تاني تأكدي منه، واسأليه هل فعلاً الأعراض اللي عندها ممكن تكون من نفس المرض ولا لأ. - اختاري شخص تثقي فيه:
لو في أخت أو أخ أو حتى مرات أخوكي إنسانة عاقلة وبتحب ماما، كلميها على جنب واحكي لها بهدوء وخدي رأيها. - اطمئني أنتِ كمان:
ما تتهميش نفسك، ولا تعيشي في دوامة الخوف. اللي بيحصل مش ذنبك، وساعات كتير ربنا بيبعث الابتلاء ومعاه الحل. - خلي خطوة الكشف لماما بسيطة:
اقترحي على ماما تروحي تكشف عشان التنميل بس، من غير ما تربطي الموضوع بمرضك، وسيبي الدكتور هو اللي يتكلم بعد كده لو لزم الأمر.
دعاء ختامي:
اللهم اشفِ كل مريض، وارزق كل قلب خائف طمأنينة، وكل عقل مشتت سكينة، وكل أم الصحة وطول العمر، وكن لنا ولأحبابنا عونًا في كل أمر
تعليقات
إرسال تعليق