اتكلمنا فيديو.. وخايفة يكون فكر عني غلط!

 بنت صغيرة بعتتلي مشكلتها وبتقول:

السلام عليكم،

أنا مرتبطة بشخص هو قريبي، جه واتقدملنا لكن أهلي رفضوا علشان شايفين إني صغيرة.

بصراحة هو عمره ما طلب مني حاجة غلط، ولا تجاوز معايا،

بس من فترة اتكلمنا فيديو كول لأول مرة،

وأنا وقتها كنت لابسة بقط، وكانت باينة تفاصيل جسمي من فوق،

ومن ساعتها وأنا ببكي ومش عارفة أعمل إيه،

حاسّة إني غلطت، وخايفة يكون فكر عني حاجة وحشة،

وأكتر حاجة مدايقاني إني خايفة أكون زعلت ربنا.

أنا عندي 16 سنة.. ياريت الرد من غير تجريح، وشكرًا.

رد بحر الأسرار:

يا بنتي، إحساسك بالندم هو أول دليل إن قلبك حي، وإنك بنت محترمة وخايفة على نفسك.

الغلطة دي مش نهاية الدنيا، ومش معناها إنك وحشة.

كلنا بشر، وكلنا بنغلط، لكن الشطارة مش إننا منغلطش، الشطارة إننا نتعلم ونقوم ونحافظ على نفسنا أكتر.

مش مهم هو فكر إيه.. المهم دلوقتي إنك انتي تتعاملي صح وتوقفي أي حاجة ممكن تجرّك لحاجة أكبر.

انتي لسه صغيرة، ولسه ليكي أحلام وحياة كبيرة، ماتسمحيش لأي موقف يهز صورتك قدام نفسك.

حل المشكلة بنقاط واضحة:

• اقطعي أي مكالمات فيها خصوصية أو لبس مش مناسب، حتى لو من شخص بتحبيه.
• ما تكرريش الموقف تاني، واعملي لنفسك حدود واضحة.
• اعملي لنفسك قيمة قدام نفسك قبل أي حد. اللي يحبك، هيحبك بإحترامك.
• اتكلمي معاه بصراحة: “أنا غلطت، بس بحب أحافظ على نفسي وربنا”. وشوفي رد فعله، لو احترمك.. كملتي مع إنسان صح.
• ما تعيشيش في جلد ذات، استغفري، وابدئي من جديد، وبلاش لوم قاسي على نفسك.
• ركزي على دراستك وطموحاتك، الحب الحقيقي مش هيهرب، بس مستقبلك محتاج تركيز.

دعاء الختام:

اللهم اجعلني بنتًا صالحة، أحافظ على نفسي وديني وقلبي، وارزقني حبًا حلالًا نقيًا، يرضيك عني ويطمّني