هي بتحبه.. بس هو متجوز!
جاتلي رسالة من بنت بتقولي:
"أنا حبيت واحد من فترة، وهو كمان بيحبني، وكل حاجة ماشية بينا بصدق... بس المشكلة إنه متجوز، وبيقولي إنه مش مرتاح في جوازه، وناوي يطلق قريب، بس الظروف مش مساعداه دلوقتي.
أنا بقيت تايهة، مش عارفة أسيبه ولا أستنى؟
كل اللي حواليا بيقولولي إني غلطانة، بس قلبي مش قادر يبعد."
رد (بحر الأسرار):
بصي يا بنتي...
الحب حاجة عظيمة، بس لو كان في طريق غلط، بيوجع أكتر ما بيفرّح.
الراجل اللي بيحب بجد، ما بيعلقش واحدة في مشاعر وموعيد مستنية الظروف.
متجوز؟ يبقى في بيت ومسؤولية وأولاد يمكن.
وانتي؟ في الآخر الطرف التاني اللي في الظل… اللي دايمًا مستني.
أنا مش بقولك تكرهيه، بس بقولك تحبي نفسك أكتر.
مفيش حب حقيقي بيجي على حساب كرامتك وراحتك.
سيبيه يظبط حياته الأول، لو هو صادق، هيرجعلك وهو حر.
ولو مشي ومارجعش، يبقى ربنا أنقذك من وجع أكبر
تعليقات
إرسال تعليق