أربع سنين حب… بس عاوز علاقة في الفون!

 جاتلي رسالة من بنت بتقول:

“السلام عليكم ورحمة الله وبركاته

أنا بحب واحد من محافظة بعيدة عني حوالي تلات ساعات، وحبينا بعض بقالنا أربع سنين.

في الأول كان عايز نعمل علاقة في التليفون، وكنت ماشية معاه، بس لما حسيت إني بقل قدام نفسي بطلت كده.

المشكلة إنه لحد دلوقتي مفيش حاجة رسمية، وكل مرة أقوله تعالى اتقدملي، يقول لسه ما جبتش شقة.

هو مقدم على شقة بقاله شهر، بس أنا تعبت ومش عارفة هو بيحبني بجد ولا بيتسلى بيا…

نفسيتي تعبانة قوي ونفسي أفهم هو بيحبني ولا لأ.”

رد  – بحر الأسرار:

يا بنتي… الحب مش كلام واتقال، الحب أفعال وخطوة لقدّام.

أربع سنين كتير، ولو كان جاد من الأول، كان على الأقل رسم خطوة تبين إنه ناوي يبقى راجل في حياتك.

العلاقة اللي بتبدأ بالضغط على البنت عشان حاجات غلط، وبتكمل بمواعيد اتأجلت، غالبًا ما بتكملش بسلام.

أنا مش هظلمك ولا أظلمه، يمكن فعلاً ناوي يتقدملك، لكن…

واحدة تعبانة نفسيًا ومعلّقة ومش عارفة مصيرها؟ ده مش حب، ده انتظار مؤلم.

لو هو بيحبك بجد، لازم يطمنك بخطوة واضحة، مش بوعد ومفيش تنفيذ.

اختبريه بهدوء، قولي له صراحة:

“أنا مش هقدر أعيش على الوعود، لو في نية جادة تعالى وخلّي في خطوة… غير كده، قلبي مش لعبة.”

واللي مكتوبلك، هتشوفيه وهيجي لحد عندك