كانت كل مرة بتقوله امشي… لحد ما مشي بجد وساب وجع ما بيتنسيش!
بنت بعتت وقالت:
“أنا بنت كنت مخطوبة، وفي فترة الخطوبة حصل بينا تجاوزات كتير… اتعودنا على بعض واتعلّقنا ببعض جدًا.
بس حصلت مشاكل، وسبنا بعض.
ورغم الانفصال، كنا لسه بنرجع لبعض، والتجاوزات كانت لسه بتحصل.
في مرة كنت متضايقة، وقلت له: سيبني لوحدي!
سمع كلامي… وبعدها لما قولتله نرجع، رفض!
قاللي: انتي اللي طلبتي…
أنا كنت بقول كلمة “امشي” كل شوية، بس من جوايا عمري ما كنت عايزة يسيبني.
دلوقتي بعدنا، وأنا مش قادرة أنسى…
أنا غلطانة؟ وهل لما الراجل يحب بجد، بيمشي لما يسمع الكلمة دي كتير؟”
رد – بحر الأسرار:
بصي يا بنتي…
الحب محتاج صدق، وخصوصًا في الكلام اللي بيتقال وقت الزعل.
لما تقولي لحد بتحبيه “امشي”، وهو فعلاً بيمشي…
متستغربيش، لأن الكلمة دي لما بتتكرر، بتكسر جواه حاجة، حتى لو بيحبك.
اللي بيحب محتاج تطمين مش طرد.
كل مرة قولتي “امشي”، كنتي بتطفّي شمعة في قلبه… لحد ما النور اختفى.
هل غلطتي؟
آه… غلطتي في إنك استخفّيتي بكلمة كبيرة زي دي،
بس لسه قدامك فرصة تتعلمي وتكبري.
لو لسه جواكي حب، اعترفي بده بصراحة، مش بتحدّي أو عتاب.
ولو هو فعلاً بيحبك، هيفهم إن كل “امشي” كانت صرخة وجع… مش رغبة في البعد
تعليقات
إرسال تعليق