أنا الراجل في العلاقة
السلام عليكم،
أنا أنسة عندي 30 سنة، مهندسة، ومخطوبة لراجل أرمل مراته توفت في حادث من 3 شهور بس…
التعارف بينا بدأ من الشغل، وكنت مستغربة إزاي واحد لسه فاقِد مراته، وبيفكر يرتبط تاني بسرعة كده؟
كنت بتجاهل كلامه، بس فجأة لقيته داخل على أهلي واتكلم بجد، وهم وافقوا…
من بره شكله بيحبني، بس أنا من جوايا مش مرتاحة.
المشكلة بدأت لما كل شوية يجيبلي مشروع ويقولي محتاجك تموليني أو تساعديني!
حاسسني إني أنا الراجل، وإن دي مسؤوليتي!
أنا مش بخيل، بس هو بيعتبر إن ده “حقه” عشان هيكون جوزي!
بصراحة، أنا شايلة الهم وبدأت أتخنق…
أنا مش عايزة أبدأ حياتي وأنا حاسة إني شايلة الليلة كلها!
أعمل إيه؟
رد | بحر الأسرار:
يا بنتي، الراجل اللي بيختارك شريكة، مش المفروض يختارك “محفظة”!
اللي لسه خارج من صدمة وفاة مراته، طبيعي يكون مكسور… بس مش طبيعي يفكر يرتبط بسرعة كده، ويبدأ يستغل اللي قدامه تحت شعار “شراكة”.
لو من دلوقتي شايفك مسؤولة عن تمويله، يبقى بكره هيشوفك مسؤولة عن كل حاجة…
وده مش حب، ولا رجولة، دي بداية استغلال.
اسألي نفسك:
هو بيحبك فعلاً؟ ولا بيشوفك باب رزق؟
هو فعلاً جاهز ليرتبط، ولا بيداري وجعه بأي علاقة؟
وأهم سؤال…
هو بيطبطب عليكي؟ ولا بيزوّق الكلام وهو شايلك الهم؟
لو مش حاسة بالأمان، يبقى وقّفي كل حاجة لحد ما تشوفي الحقيقة بعيونك، مش بكلامه.
دي حياتك… وقرارك أهم من أي مشروع وهمي.
ربنا يكتبلك الخير يا بنتي، ويريّح بالك.
تعليقات
إرسال تعليق