كنت قريبة من ربنا… وبقيت مدمنة حاجة حرام
جاتلي رسالة من بنت بتقول:
“السلام عليكم..
أنا بنت مُحتمرة وكنت بصلي وبقرأ قرآن، بس معرفش حصلي إيه!
بقيت مدمنة أفلام إباحية، والله عارفة إنه حرام ومش قادرة أبطل.
صعبان عليا أبويا، راجل بسيط وصرف عليا دم قلبه لحد ما دخلت الجامعة، وكان دايمًا بيقولي: أنا بصرف علشان أفرح بيكي وأفتخر بيكي قدام الناس.
أنا ضيّعت كل حاجة… مذاكرة، التزام، وكل حاجة.
بس رغم كده عمري ما ارتبطت بولد، ولا صاحبت شباب زي بنات الجامعة.
حاسه إني ممكن أموت وأنا بتفرج على الحاجات دي وربنا يغضب عليا.
أرجوكم… أنا تايهة. أعمل إيه؟”
رد – بحر الأسرار:
يا بنتي… أول حاجة لازم تعرفيها، إن ربنا دايمًا فاتح بابه للتايبين، والشيطان دايمًا بيحاول يقنعك إنك وقعت ومش هتعرفي تقومي… بس الحقيقة غير كده تمامًا.
إنتي مش مدمنة، إنتي متعلقة بحاجة غلط، ودي حاجة بتحصل لناس كتير، من شباب وبنات، لكن الشطارة مش في الوقوع… الشطارة إنك تقومي.
إنتي صريحة مع نفسك، وده أول خطوة في العلاج.
خلي بالك من شوية حاجات:
- اقطعي السكة: أي مصدر بيخليكي توصلي للحاجة دي (موبايل لوحدك، أو مكان معين…) اقفلي الباب ده.
- اشغلي وقتك: الرياضة، شغل البيت، قراءة، أو حتى تطوعي في أي نشاط… فرّغي الطاقة دي.
- ارجعي لصلاتك، حتى لو بتحسي إنك مش نضيفة… ربنا قال: “قل يا عبادي الذين أسرفوا على أنفسهم لا تقنطوا من رحمة الله.”
- اعملي ورد يومي ولو حتى صفحة قرآن، هيحميك من نفسك ومن الشيطان.
- فاكري أبوكي… هو قالك “أفتخر بيكي”، وهو فعلاً هيفتخر… لما يشوفك قومتي من اللي وقعتي فيه.
متخافيش من الموت، خافي تكملي كده… لكن طول ما فيه نفس، فيه فرصة ترجعي وتكوني أحسن من الأول.
ربنا شايف دموعك قبل ما تبعتيلي الرسالة… وصدقيني، هو أحن بكتير من اللي بتتخيليه
المشكله كبيره بس اللي عجبني الرد جدااااا رائع والله ياخي جميييل ردك
ردحذفاسلوبك راقي♥♥
ردحذف