هو فين الاهتمام؟!” – لما الخطوبة تتحول لصمت وواجب مش مشاعر
المشكلة كما وردت:
(من صاحبة المشكلة – فتاة في أوائل العشرينات)
أنا مش عارفة أنا صح ولا غلط، ومحتارة أكمل ولا لأ. كل حاجة في الأول كانت تمام، واتخطبنا، وكان في كلام كتير بينا… بس مع الوقت بدأ يقل، ولقيته بقى مع صحابه أكتر، يكلمهم بالساعات، ولما يكلمني يقفل بعد دقايق.
حتى لما بييجي من السفر، مش بيجيلي غير زيارة واحدة قصيرة، وبيفضل برضه مع صحابه أكتر. كنت بشك، مين ممكن يقعد اليوم كله يتكلم مع صحابه؟ رحت وسجلت رقمه على فودافون وتتبعت المكالمات، فعلاً مالقيتش بنات… بس لقيته بيكلم صحابه وقت طويل جدًا.
المشكلة إنه مش بيهتم، كل حاجة بيحسبها بالورقة والقلم، وأنا اللي بجيب هدايا وبصرف عليه عشان مكسوفة من أهلي… ومش عايزة أقول إنه مش بيعمل حاجة!
طلبت منه اهتمام، حوار، كلام، رومانسية، رفض بحجة إن ده حرام و”انتي لسه مش مراتي”. ولما بنتعاتب، بيقولي “قولي عايزة إيه وأنا أعمله” لكن ميكملش يومين وبيبقى نفس الإهمال.
هو بيقول بعد الجواز هتلاقي كل حاجة، بس أنا مش شايفة أي بوادر، وحاسة إني مش موجودة في حياته… أنا تعبت، ومش عارفة أكمّل ولا أنهي.
رد بحر الأسرار:
يا بنتي، الخطوبة مش بروفة للجواز بس، دي اختبار حقيقي لنوع الحياة اللي هتعيشيها. لما الإهمال يبقى من دلوقتي، يبقى إنتي لازم تفكري بصوت عالي… مش عشان تظلمي حد، لكن عشان متظلميش نفسك.
الحل – خطوات تقدر تساعدك:
- اجلسي معاه مواجهة صريحة جدًا: قولي له إنك محتاجة تعرفي شكله في الجواز هيبقى عامل إزاي… مش بالكلام، بالأفعال.
- احكي له كل اللي جواكي من غير خوف: وضحي له إنك مش بتدوري على رفاهية، إنتي بتدوري على شريك حياة بيهتم، بيشارك، مش بس موجود عالهامش.
- راقبي رد فعله بعد المواجهة: هل هيتغير فعلًا؟ ولا هيرجع يتناسى زي كل مرة؟
- اعملي قائمة باللي بتقدميه واللي بتاخديه: لو الكفة دايمًا رايحة ناحية عطاءك بس… لازم تعيدي حساباتك.
- شاوري ناس من العيلة تثقي فيهم: سواء والدك، أو أخوك، أو شخص كبير حكيم… مش لازم تمشي في طريق لوحدك.
- اقطعي المقارنة بين “اللي بيقوله” و”اللي بيعمله”: الجواز ماينفعش يعيش على كلام… لازم أفعال تثبت إنك أولوية مش خيار.
دعاء بحر الأسرار:
اللهم إن كانت في هذا الارتباط خير لي في ديني ومعاشي وعاقبة أمري، فسهله لي وبارك لي فيه، وإن كان فيه شر لي فاصرفه عني واصرفني عنه، واقدر لي الخير حيث كان، ثم ارضني به
دي حقيقة فعلا
ردحذف